Die Suid-Afrikaanse Boerperd is in die buitewêreld gesog vir hul veelsydigheid en gematigde temperament. Hulle is slim, maklik om te leer en gemaklik om te ry.

Die veelsydigheid van die SA Boerperd word van 14 tot 19 Julie uitmuntend gedemonstreer deur ‘n verskeidenheid dissiplines by die jaarlikse Nasionale SA Boerperd-kampioenskappe wat by die AfriDome in Parys gehou word.

Die kampioenskappe is sedert 2009 ‘n jaarlikse instelling in Parys, wanneer ruiters die koue trotseer om teen mekaar te kompeteer. Toegang vir die kampioenskappe is gratis en alle belangstellendes is welkom om te kom kyk.

Op die Maandag se program is die dresseer en ryperd-klasse en hul kampioenskappe, gevolg deur die in-hand klasse en hul groot kampioenskappe die Dinsdag, asook die skouspring klasse en kampioenskappe. en die opwindende Werkende Jagperd-klasse as outomatiese kampioenskappe.

Tussen die kwalifiserende klasse, sal daar ook outomatiese kampioenskappe wees in byvoorbeeld  Ruiterkuns- en Western Pleasure klasse.

Die kwalifiserende klasse van Woensdag tot Vrydag, sluit die volgende klasse in: Tradisionele driegang-, vyfgang- en vertoonperd klasse; universele driegang klasse; universele- en tradisionele enkeltuig, sowel as siertuig-klasse.

Die boerperd leen hom ook as kinderryperd in die skoleliga waar aan die Sanesa-kampioenskappe deelgeneem kan word, en is die SA Boerperde jaarliks die top presterende perderas.

Kom beleef die veelsydigheid van hierdie perderas en uitsonderlike ruiterkuns by die SA Boerperd-kampioenskappe in Parys.