Met die Feestyd en Desember-vakansie wat voorlê, berei baie Suid-Afrikaners hulself voor om in die buitelug saam met familie en vriende te kuier. Of jy nou by die huis, in ’n restaurant of by ’n privaat lokaal onthaal, is dit belangrik om nie veiligheid uit die oog te verloor nie.

Charnel Hattingh, Groepshoof van Bemarking en Kommunikasie by Fidelity Services Group, waarsku dat misdadigers al hoe meer uitgeslape is.. Geleenthede waar mense bymekaarkom om te ontspan en fees te vier, word dikwels as maklike teikens beskou.

“Geleentheidsmisdaad gebeur binne sekondes. Die beste manier om jouself en jou gaste te beskerm, is om waaksaam te bly en die regte sekuriteitsmaatreëls in plek te hê,” sê Hattingh.

Praktiese sekuriteitswenke vir buite-ontspanning:

• Beveilig jou huis: Maak seker dat alle stelsels—veral buitesensors, elektriese heinings en CCTV—ten volle funksioneel en geaktiveer is.
• Hou hekke gesluit: Moenie hekke ooplaat terwyl jy vir gaste wag nie. Dit skep ’n maklike toegangspunt vir indringers.
• Dra ’n paniekknoppie: Hou dit altyd by jou. ’n Stil panieksein kan lewens red in ’n noodgeval.
• Bestuur gasteparkering: Laat gaste indien moontlik binne jou eiendom parkeer. 
• Installeer voldoende beligting: Buitebeligting, veral bewegingsensors, is ’n eenvoudige maar doeltreffende afskrikmiddel.

“Sekuriteit hoef nie jou pret te bederf nie—dit moet jou gemoedsrus versterk,” sluit Hattingh af. Maak seker jy het die regte stelsels, en ’n paar basiese voorsorgmaatreëls in plek.