Tweede botsing vandag op R59; bejaarde sterf
Vanmiddag se botsingstoneel is reeds opgeruim en is die pad oop vir verkeer.
‘n Bejaarde vrou is vroeër vanmiddag oorlede na ‘n botsing op die R59 tussen Parys en Vredefort.
Die ongeluk het net voor 15:00 sowat 150m duskant die Schoemansdrift-afrit gebeur,
‘n Hilux bakkie en ‘n Polo was in die botsing betrokke en is die vrou wat ‘n insittende in die Polo was op die toneel oorlede.
Die ander insittendes van die twee voertuie is nie ernstig beseer nie.
Die toneel is reeds opgeruim en die pad is oop vir verkeer.
Die botsing volg nadat daar vroeg vanoggend ook ‘n vragmotorbotsing op die R59 duskant die N1 in die rigting van Sasolburg was. Geen ernstige beserings is met die vragmotorbotsing gerapporteer nie.
Wees waaksaam
Met nog reën wat van Sondag af vir Parys voorspel word, word motoriste ook gewaarsku om uiters versigtig en stadig te ry wanneer jy van die R59 gebruik sou maak. Daar is groot en diep slaggate veral op die gedeelte tussen die N1-oorbrug en Parys, tussen Parys en Vredefort, en duskant Vredefort in die rigting van Kroonstad.
Hou volgafstande en hou in gedagte dat dié gate baie moeilik sigbaar is veral saans en in reënweer wanneer sig belemmer word.
Op gedeeltes veral tussen Parys en Vredefort en duskant Vredefort is daar ernstige skade aan die teervlak.
