BKS-entstofsaak gaan hof toe ná mislukte mediasie

Die aansoek handel oor private verkryging en toediening van geregistreerde of goedgekeurde bek-en-klouseer (BKS) entstowwe wat volgens regeringsbeleid nie toegelaat word nie.

March 21, 2026

Liezl Scheepers 1 minute read

Die kenmerkende bekletsels van Bek-en-Klouseer. Foto: Verskaf

As die dringende aansoek van Vrystaat Landbou (VL), Sakeliga en SAAI Dinsdag (24 Maart) in die Pretoriase hooggeregshof slaag, kan boere en ander vee-eienaars na alle waarskynlikheid onmiddellik in staat wees om hul eie beeste, en ander vee, met hul eie hulpbronne teen Bek-en-klouseer, te ent, met die nodige verslagdoening soos vereis.

So sê Vrystaat Landbou (VL), wat saam met SAAI en Sakeliga, ‘n dringende aansoek tot die hof rig om die regering te verhoed om die private verkryging en toediening van geregistreerde of goedgekeurde bek-en-klouseer (BKS) entstowwe te keer, nadat pogings tot mediasie tussen die betrokke partye misluk het.

Dinsdag se hofverskyning handel oor die eerste fase van die organisasies se aansoek, en vra ook dat die staat nie in kontraktuele ooreenkomste tussen wettige entstof-invoerders en hul verskaffers mag inmeng nie,” het Francois Wilken, president van VL gesê.

’n Hersieningsaansoek, wat die tweede fase van die proses sal vorm, sal op ’n later stadium volg, het Wilken, gesê. Hierdie hersieningsaansoek sal onder meer poog om bevestiging te kry dat daar geen wettige gronde is wat vee-eienaars verhoed om entstowwe toe te dien nie, of alternatiewelik dat enige sodanige belemmering tersyde gestel word.

Wilken sê die organisasies het hulle tot die hof gewend omdat die Minister van Landbou versuim het om ’n wettige rede te gee vir sy verbod op die privaate verkryging en toediening van BKS-
entstowwe.

Landbou-amptenare se inmenging in private entstof-invoer-ooreenkomste het reeds groot onsekerheid en beduidende produksieverliese in die landbousektor veroorsaak, sê VL.

VL het beklemtoon dat niks in die aansoek die minister of ander amptenare sal verhoed om hul wettige pligte na te kom of om die siekte te beveg nie.

Wilken sê dit bly egter onverklaarbaar waarom die minister ’n parallelle benadering teenstaan waar die staat en die private sektor saam die siekte kan bekamp, eerder as om die proses te beperk tot
die kapasiteit van die departement.

At Caxton, we employ humans to generate daily fresh news, not AI intervention. Happy reading!

March 21, 2026

Liezl Scheepers 1 minute read

Liezl Scheepers

Liezl Scheepers is editor of the Parys Gazette, a local community newspaper distributed in the towns of Parys, Vredefort and Viljoenskroon. As an experienced community journalist in all fields for the past 30 years, she has a passion for her community, and has been actively involved in several community outreach projects as part of Parys Gazette's team.