INGCO Parys 400, wat ook die openingsronde is van vanjaar se SA Rally-Raid Kampioenskap, het Vrydag op ’n interessante maar uitdagende noot in Parys begin. Terwyl toeskouers langs die roete deur die motorren-aksie vasgevang is, kon deelnemers en hul spanne die vroeë seisoensenuwees afskud en die uiteenlopende terrein geniet.

Die eerste dag van die INGCO Parys 400 het bestaan uit ’n baie kort kwalifiserende wedren terwyl die veld nog nat was van die oornagdou, en slegs sekondes het die 29 spanne van mekaar geskei. Daarna het twee skofte gevolg, met vinnige oop gedeeltes sowel as klipperige heuwels en modderkolle wat die spanne gedwing het om tot die einde gefokus te bly.

Ná die kwalifiserende wedren was dit duidelik op die puntelys dat die jongelinge Jayden Els en Johann Swemmer, nou in die kleure van die Century Racing Factory-span en kompeterend met die CR7, ernstige bedoelings gehad het toe hulle die vinnigste tyd aangeteken het. Hulle was egter net drie sekondes vinniger as Danie Ludick en Denzil Williamson, wat nou in ’n Castrol NWM Ford Rally-Raid Evo Plus jaag. Die voormalige kampioene en hul spanmaats, Gareth Woolridge en Boyd Dreyer, was slegs een sekonde verder terug ná net meer as drie minute se wedrenry.

Hennie de Klerk en Carl Swanepoel (Toyota Hilux) het vierde geëindig, gevolg deur die drie Toyota Gazoo Racing-spanne wat presies dieselfde tye in hul Hilux IMT EVO-masjiene aangeteken het – Guy Botterill en Oriol Mena Valdearcos, die verdedigende kampioen Saood Variawa met Charan Moore as navigator, asook sy broer Sa’aad Variawa en Wade Harris.

Hulle was net een sekonde vinniger as die Duitse jaer Daniel Schröder en Juan Möhr (PS Laser WCT VW Amarok), met nog ’n sekonde wat hulle geskei het van die twee spanne wat die top tien voltooi het – Fouché en Bertus Blignaut (#TeamHilux Rally-Raid Toyota DKR T1+ EVO), wat die pad geopen het, en Daniel se pa, Jurgen Schröder, saam met navigator Rikus Fourie in ’n soortgelyke PS Laser WCT VW Amarok. Beide spanne het dieselfde tyd aangeteken.

Hierdie tien spanne het daarna geloot om hul wegspringposisies vir Skof Een te bepaal, met Schröder/Fourie eerste op die roete, gevolg deur die Blignaut-broers, Variawa/Harris, Saood Variawa/Moore en Botterill/Mena Valdearcos as die eerste vyf spanne wat weggespring het.

Dit was ’n spel van klippe ontduik en vinnig vlieg terwyl spanne terselfdertyd versigtig moes wees om die beste moontlike tye aan te teken met die oog op ’n gunstige wegspringposisie vir die tweede dag en die grootste deel van die INGCO Parys 400 se renkilometers. Toe die stof gaan lê, was dit Woolridge/Dreyer wat bo-aan die ranglys verskyn het (00:30:07), met Saood Variawa/Moore slegs drie sekondes agter hulle in die tweede plek, gevolg deur Botterill/Mena Valdearcos (00:30:18), nog agt sekondes later.

Die twee #TeamHilux Rally-Raid-inskrywings, die Blignaut-broers (00:30:34), wat tweede weggespring het, en die voormalige veelvoudige kampioene Giniel de Villiers en Dennis Murphy (#TeamHilux Rally-Raid DKR Hilux T1+ EVO), wat 12de weggespring het, het die dag onderskeidelik vierde en vyfde afgesluit. Elf sekondes het hulle geskei nadat De Villiers/Murphy tyd verloor het toe hulle ’n rots getref het wat bandskade veroorsaak het net voor die einde van die eerste skof. ’n Voorband is ook beskadig.

Die Brasiliaanse span van Marcos Baumgart en Kleber Cincea in die tweede Castrol NWM Ford Rally-Raid Evo Plus het net buite die top tien weggespring en hul pad na die sesde plek (00:31:17) gebaan, terwyl Ludick/Williamson algeheel agtste geëindig het, 11 sekondes agter hul Brasiliaanse spanmaats.

Tussen hulle was die vroeë voorlopers in Ultimate SA T1+, Gary Bertholdt en Henry Köhne (Toyota Hilux) op 00:31:20. De Klerk/Swanepoel (00:31:33) het hul wedren goed begin deur negende algeheel en tweede in Ultimate SA T1+ te eindig. Die jong Sa’aad Variawa en Harris (00:31:39) was 10de algeheel en agtste in Ultimate FIA T1+, met slegs 92 sekondes wat die top tien spanne geskei het.

Die vierde van die vyf Castrol NWM Ford Rally-Raid-spanne, Wors Prinsloo en André Vermeulen (Evo Plus), het die eerste dag net buite die top tien in 11de plek (00:31:46) voltooi. Schröder/Möhr was 12de (00:32:37), gevolg deur die eerste van die Red-Lined Motorsport-span, Philip Botha en Andries Mynhardt (Revo T1+), 13de algeheel en derde in SAT1+.

Brian Baragwanath en Leonard Cremer in die tweewielaangedrewe Century Racing Factory CR6T het tyd verloor met ’n pap band en was 14de (00:33:25). Voormalige SSV-kampioene Geoff Minnitt en Rodney Burke (Hydro Power Equipment Maverick) het die Challenger-klas gelei en was 15de (00:33:36), met ’n minuut en 45 sekondes wat hulle van die Nederlandse broers Henk en Pim Klaassen (DaklaPack Rallysport Taurus T3Max) geskei het. Die Nederlanders was tweede in die klas en 19de algeheel.

Die Nederlandse duo Victor Versteijnen en Petrus van Dal (DaklaPack Rallysport Red-Lined Revo GTR) was 16de (00:33:39), terwyl Els/Swemmer ná meganiese probleme 17de (00:33:58) geëindig het. Lood du Preez en Adriaan Roets (Farmers Meat Century Racing CR6) was 18de (00:34:18), met Abrie en Iaan Olivier (VAPS HCV Rally-Raid Team Red-Lined Revo T1+) in 20ste plek (00:35:54).

Hul VAPS HCV Rally-Raid-spanmaats, Peet Victor en VanZyl Jonck, het die leiding in die Adventurer-klas geneem (00:38:36), terwyl spanmaats Tyler Botha en Kyle Lotter die klas se podium voltooi het. Tussen hulle was Tokkie Ferreira en Nardus Janse van Rensburg (Ford Ranger), wat tweede in die klas geëindig het.

Schröder/Fourie het probleme met die kragstuur ondervind en moes met 22ste plek (00:38:13) tevrede wees, terwyl die verdedigende Adventurer-kampioene, Johan en Sean van Staden (Red-Lined Revo T1+), ná probleme die dag eers in 27ste plek (02:18:59) afgesluit het.

Met die eerste dag afgehandel, wag meer as 400 kilometer se wedrenaksie op die spanne vandag, Saterdag 20 Junie.

Volg die aksie

Entoesiaste kan die wedren volg via die RallySafe-toepassing, vanaf verskeie skouspelagtige uitkykpunte langs die roete waaronder ook die Weiveld silo’s, of op Facebook: @sarallyraidchampionship; Instagram: @sarallyraidchampionship; TikTok: @sarallyraid en YouTube: @SouthAfricanRallyRaidSARRC.