Die room van die land se boerboele van 55 telers uit al nege provinsies was die afgelope week by die AfriDome in Parys te sien tydens die Suid-Afrikaanse Boerboeltelersgenootskap (SABBS) se internasionale skou.

Altesaam 308 boerboele is deur twee internasionale en twee Suid-Afrikaanse beoordelaars beoordeel. Uiteindelik was dit Ziyaad Issa, eienaar van die 19 maande oue Bandit Orion, wat met die toptoekenning weggestap het as die Suid-Afrikaanse Boerboeltelersgenootskap se Hond van die Jaar vir 2026. Ziyaad is eienaar van Bandit Boerboels in Bloemfontein, en ook die ondervoorsitter en Vrystaatse verteenwoordiger van SABBS met sy 650 lede.

Ziyaad het in totaal ses wenplekke ingepalm, waaronder Grootkampioen Senior Reun.

Daar was ook groot vreugde toe die 14-jarige Sergio Kannemeyer as Internasionale Hanteerder van die Jaar aangewys is. Sergio, ‘n graad 9-leerder aan Curro Durbanville, het in 2023 begin skou. By vanjaar se skou behaal eerste plekke in klas 3A, klas 3B, Junior Handler 2, klas 6 B en die Familie klas. Hy wen die Sub-Junior Female Champion klas, sowel as die Sub Junior Male Champion klas en Junior Champion Male. Dan spog hy ook met die titel Reserve Grand Champion Male, ‘n derde plek in Klas 4B, tweede plek in die Junior Handler 2-klas en ‘n tweede plek in klas 3B.

Die jongste vertoner was die driejarige Herlu Klopper.

Beoordelaars by die skou het onder meer na die honde se algemene voorkoms, temperament, beweging en posering gekyk.

Boerboele is nie net indrukwekkend in voorkoms nie, maar is ook bekend vir hul trouheid, gewilligheid om hul families te beskerm, asook hul gehoorsaamheid en intelligensie. Besoekers van onder meer Europa en Amerika het die skou bygewoon om die beste van dié ikoniese ras te sien.