Gesinsgeweld, en gevalle van mishandeling van bejaardes is ‘n realiteit in gemeenskappe. Enigeen kan ‘n slagoffer hiervan wees. Ongelukkig is daar dikwels die wanopvatting dat geweld net fisies is, en word die tekens misgekyk waar daar nie sigbare letsels is nie. Dit geld veral in gevalle van emosionele, finansiële of selfs seksuele misbruik.

Tog is dit belangrik dat gesinsgeweld en enige vorm van mishandeling gerapporteer word. Dit was die boodskap van die polisie se adjudant-offisier Izelle Engelbrecht wat met gevalle van sosiale misdaad en huishoudelike geweld werk. Engelbrecht het Dinsdag met bejaardes van Sally Martin Park gesels as deel van ‘n bewusmakingsinisiatief van Parys SAPD en die Parys Gemeenskap Polisiëring Forum (GPF).

Sy het benadruk dat die welstand van bejaardes belangrik is en dat enigeen gesinsgeweld of misbruik kan rapporteer.

Engelbrecht het ook verduidelik waar om hulp aangeklop kan word en watter stappe gevolg word. Hoewel dit ‘n tydsame proses kan wees wanneer howe moet ingryp byvoorbeeld sou ‘n beskermingsbevel nodig wees, is die belangrikste en eerste stap om dit by die polisie of ander instansies wat hulp kan verleen te rapporteer.

Inligtingspamflette is ook aan die bejaardes uitgedeel.