Parysenaars is oorwegend positief oor die gedagte om die dorp se Domefees wat vir jare hier gehou is, voortaan as dorpsfees aan te bied.
Vyf en twintig mense het die onlangse vergadering oor die beplanning van die fees bygewoon, en is die voorgestelde formaat van die fees, goed ontvang.
Hoewel dit duidelik is dat daar uitdagings sal wees, waaronder eerstens om ‘n geskikte datum vir die fees te kry, wil dit lyk asof Parysenaars gemaklik is met die fees-idee waarmee die hele gemeenskap betrek sal word vir een groot feestelikheid met verskeidenheid.
Of dit ‘n kunstenaarsoptrede, vriendskaplike rugby- of rolbalkragmeting, kunsuitstalling, wynproe, Koepel-kaskenades, sjef-a-la-cousine, safari-ete, deurnagkuier of watter kreatiewe geleentheid ook al is.
Die plan is dat elke besigheid, instansie, klub of skool in die dorp sy eie unieke feesgeleentheid sal reël en bemark, met die Parys Ontwikkelingsforum wat die oorkoepelende koördinering sal doen, en in ruil ‘n gedeelte van die opbrengs van elke feesgeleentheid sal kry.
Of jy man-alleen, of saam met ander besighede wil kragte saamspan – hierdie is ‘n geleentheid om die dorp en dit wat Parys het om besoekers te bied, te bemark.
Daar sal weer op 27 Mei om 18h00 by Parys Info-kantoor in Waterstraat vergader word oor die beplande fees. ‘n Domefees-koördineerder/direkteur moet ook gekies word.
Jy kan ook die Parys Info-kantoor skakel met idees of vir navrae by (056) 811 4000.