Dit beteken dat dit steeds net ‘n beleidsdokument is, en nie ‘n ‘wet’ nie. Talle versoeke van VF Plus rdl. Philip van der Merwe om dit te promulgeer, het na maande nog net op dowe ore geval. Gevolglik laat dit ‘n groot dilemma vir wetstoepassers, veral nou in die feestyd, wanneer bywette kon help om riglyne vir kwessies soos hierdie binne munisipale grense te stel.

Rdl. Van der Merwe wat ook ‘n prokureur van beroep is, was instrumenteel in die saamstel van die bywet wat aanvaar is nadat hy ‘n ou beleidstuk wat geen strafmaatreëls bevat het nie, verwerk en omskep het in ‘n konsep bywet wat na promulgasie daarvan die gebruik van vuurwerke sal beheer. Hy het dié inisiatief geneem nadat lede van die gemeenskap, veral organisasies wat dierebelange beskerm, lank gekla het oor die gebrek aan beheer oor klappers en ander vuurwerke.

Dit is algemeen bekend dat die skiet van klappers nie alleen ‘n traumatiese effek op veral honde het nie, maar ook deur vele inwoners as uiters steurend ervaar word.

Die bywet, sou dit gepromulgeer word, sal voorsiening daarvoor maak dat enige persoon of instansie wat vuurwerke wil afvuur of verkoop binne die munisipale gebied, dit slegs sal kan doen op aansoek, en nadat ‘n permit wat dit magtig, deur die munisipaliteit uitgereik is. Handelaars van vuurwerke sal dan ook benewens hul aansoek en geskrewe goedkeuring van die munisipaliteit, steeds in besit moet wees van die toepaslike lisensie soos vereis deur die Wet op plofstowwe.

Hoe sou die bywet kon help?
‘n Boete van tot R10 000 of gevangenisstraf van tot 12 maande kan volgens die bywet deur die hof opgelê word by skuldigbevinding van ‘n oortreding van die bywet wanneer dit van krag word. Die afvuur van enige tipe vuurwerke (wat as plofstof gesien word), word wel steeds beheer deur die Plofstofwet 26 van 1956 wat landwyd sonder uitsondering van toepassing is, maar sou die promulgering van die bywet vir Parys ,wetstoepassers se hande aansienlik sterker maak. Die vraag is egter, sou die bywet in plek gestel word, wie die munisipaliteit sal kry om seker te maak dit word nagekom. Vroeër het munisipale verkeersbeamptes die funksie vervul. Parys het nie meer munisipale verkeersbeamptes nie.
Die polisie self sit met die uitdaging van beperkte mannekrag en voertuie, en het reeds hul hande vol veral oor Kersfees en Nuwejaar, wanneer daar tradisioneel meer padblokkades gehou word, en polisiëring nodig is by groot byeenkomste soos op 24 Desember by Mimosa Tuine.

Hoewel vuurwerkhandelaars steeds die nodige permitte moet hê, is daar soveel handelaars en straatverkopers wat wetstoepassing bemoeililk. Die polisie konfiskeer jaarliks vuurwerke by handelaars wanneer nie aan wetsvereiestes voldoen word nie, maar dit is net die spreekwoordelike druppel in die emmer. Die polisie stel daarom voor dat inwoners, sou hul handelaars sien wat vuurwerke verkoop wat nie in ‘n glaskas toegesluit is nie, of onder ‘n toonbank gehou word sonder ‘n sigbare geldige permit, dit by die polisiestasie se vuurwapenlisensie-afdeling gerapporteer moet word.

Hoe affekteer vuurwerke diere?
Diere se gehoor is baie beter as dié van mense. Waar mense tussen 20Hz en 23KHz kan hoor, hoor honde 60Hz tot 45KHz, en katte 45Hz tot 64KHz. Dit beteken dat katte dus klanke kan hoor wat minstens twee en ‘n half oktawe hoër is as wat mense kan hoor. Dit is ook waarom katte en honde reageer op fluitklanke. Dit verduidelik waarom katte en honde so bang is vir vuurwerke.

Die plofstofwet

Kyk jy na die plofstofwet, word die afvuur van vuurwerke in ‘n gebou, of in enige openbare plek of oord onder meer verbied as daar nie vooraf geskrewe toestemming deur die plaaslike owerheid is nie. Daar word ook verwys na uitstallings van vuurwerke op persele wat nie gedoen kan word sonder die nodige permitte nie, waarvoor daar duidelike voorwaardes is, en die oortreding hiervan as kriminele oortreding uitgewys word. Selfs al sou ‘n handelaar ‘n permit hê, kan die vuurwerke nie geskuif word na ‘n straatstalletjie of waar die publiek dit kan hanteer nie.

Daar is duidelike reëls oor verpakking. Verder bepaal die wet dat kinders onder 16 nie ‘n permit kan kry om vuurwerke te hanteer of te gebruik, sonder volwasse toesig nie.

Waar dit kom by die afvuur van vuurwerke op private eiendom, en die wettigheid aldan nie daarvan, is dit weer eens plaaslike regulasies wat die deurslag kan gee.

Tans moet inwoners hulle verlaat op algemene nasionale bywette, waar die afvuur van vuurwerke in woongebiede nie verbode is nie – slegs in parke, strate of op sypaadjies. Dan ook nie binne 200m vanaf hospitale, klinieke, vulstasies, ouetehuise, verpleeginrigtings of by diereversorgingsplekke nie.