Die gedenkdiens vir die 47-jarige sersant Lucas Tshediso Semenyane wat op 12 September in ‘n noodlottige motorongeluk op die N8 naby Sannaspos gesterf het, sal Woensdag 23 September in Bloemfontein gehou word.

Sersant Semenyane was saam met ander polisielede onderweg na ‘n klagte toe die noodlottige botsing die oggend omstreeks 02:45 plaasgevind het. Hy is op die toneel oorlede.

’n Tweede polisielid, die 44-jarige konstabel Menzeleni Douglas Macala, wat in dieselfde voertuig was, is in die botsing beseer maar is reeds ontslaan na behandeling.

’n Saak van strafbare manslag is geopen en die omstandighede rondom die ongeluk word steeds ondersoek, het die polisie gesê.

Kollegas, familie, vriende en lede van die gemeenskap sal tydens ’n gedenkdiens en amptelike begrafnis wat Saterdag 26 September in Botshabelo gehou word, hulde bring aan Semenyane.

Die polisie in die Vrystaat het sy innige meegevoel met Semenyane se familie, vriende en kollegas betuig.