Op 70 nog jonk genoeg om die ringe oor die net te laat sing
Parys se ringtennisklubspelers het nie net uitstekend gevaar by die 53ste SA Ringtennis-toernooi nie, maar ook kon spog met van die oudste spelers by die toernooi.
Spelers van Parys-ringtennisklub het die afgelope naweek vir Sedibeng die ringe oor die net laat sing by die 53ste SA Ringtennis-toernooi wat in Alberton gespeel is. Die Sedibeng B-span kon aan die einde van die toernooi met ‘n derde plek wegstap, met die Parysenaars, Adriaan Lewies, Lené van der Merwe, Braidon Barnardo en Monya Siragopoulos wat hul plek op die baan volgestaan het vir die span.
Adriaan en Lené is ook ingesluit in die SA o.16-ringtennisspan, met Adriaan wat kaptein van die span is. Braidon en Monya is as reserwes in die SA o.16-span ingesluit.
Johan en Esther het die naweek vir Sedibeng se A2 veterane gespeel wat vyfde geëindig het in die A-afdeling.
Johan is ingesluit in die SA veterane-span, en Esther as reserwe vir die SA uitnodigingspan.
Beide was die oudste spelers by die toernooi. ‘n Besonder groot prestasie vir die 71-jarige Johan, en 70-jarige Esther.
Esther is ook spanbestuurder vir die SA o.16-span.
