Gholfeiland laagwaterbrug gesluit
Beide die laagwaterbrug na Gholfeiland en die Schoemansdrift laagwaterbrug in die Vredefort Koepel is gesluit met water van die Vaalrivier wat oor die brue loop.
Die laagwaterbrug na die Parys Golf & Country Estate is gesluit met die Vaalrivier se water wat oor die brug stroom.
Die rivierwater het ook reeds in Fickstraat naby Parys se geskiedkundige hangbrug oor die Vaalrivier begin loop.
Barrage
By Woodlands stroomaf van die Barage is die watervloei as volg gemeet:
12:00 – 2 132 kubieke meter per sekonde
13:00 – 2 107 kubieke meter per sekonde
14:00 – 2 090 kubieke meter per sekonde.
Water vloei van vanoggend af natuurlik (vrye vloei) by die Barrage en is tien sluishekke by Vaaldam tans oop.
Mense word aangeraai om betroubare en geverifieerde bronne as verwysing te gebruik met betrekking tot opdatering van die daaglikse situasie by Vaaldam en die Barrage. Berigte is reeds ontvang van foutiewe en misleidende inligting wat versprei word en wat onnodig paniek saai. Let wel dat akkurate en korrekte inligting rondom die situasie wel deur amptelike kanale daagliks deurgegee word.
Bly uit die water en weg van die rivieroewer
Wat ook belangrik is om te onthou is dat jy nou uit die rivier en weg van die rivieroewer moet bly met verhoogde vloei van die Vaalrivier wat tans gesien word.
In gevalle waar mense eiendom tussen die Barrage en Parys moes ontruim, kon daar veilig ontruim word.
Schoemansdrift laagwaterbrug
Hou ook in gedagte dat die Schoemansdrift-laagwaterbrug in die Vredefort Koepel steeds gesluit is vir alle verkeer. Watervloei by die brug het teen 15:00 vanmiddag 2 274 kubieke meter per sekonde gemeet en die watervlak is as 3,80m by die brug gemeet.
