Spel nou tongknopers soos gespikkelde-miniatuurgroentekewer, meervoudigeprobleemsiektetoestande, metaaloksiedsilikonveldeffektransistor, of gewapendebetonbrugkonstruksiemaatskappy.
Van die begin het dié program waar jy jou letters teen sekondes agter mekaar moet kry, vir Carla du Plessis-Viljoen van Parys vasgenael voor die TV gehou.
Toe die uitnodiging in Desember kom om vir KykNet se baie gewilde program, “Op die Spel” in te skryf, het Carla nie op haar laat wag nie en die aanlyn inskrywing voltooi. Toe kom die nuus dat sy die aanlyn toets geslaag het, en is ‘n telefoniese onderhoud met haar gevoer.
Kort daarna het sy, terwyl sy hard aan die oefen op die muurbalbaan was, gehoor dat sy gekeur is vir die TV-opname. Uit die meer as 600 aanlyn-aansoeke, was dié voorreg net 32 leerders beskore.
Die reeks word vanaf 8 April uitgesaai en sal jy Carla in aksie sien waar sy haar spelvernuf teen mede-leerlinge vanoor die land toets. Carla is ‘n graad 9-leerder van Hoërskool Parys.
