Aan ‘n palisade-heining in Bronkhorstspruit hang 5 tot 10 maskers op ‘n slag.
Ontsmet en geseël in ‘n sakkie met ‘n nota wat hulle wat dit neem verseker dat die masker skoon en veilig is. Die maskers is gratis vir enigeen om te neem.
Sedert Jo-Ann Smit die maskers begin adverteer het in haar woonbuurt stop talle hier om hul maskers so in die verbygaan te neem.
Jo-Ann was nog nooit een vir stilsit nie. Daarvan getuig haar naaldwerkkamer waar haar vaardige hande en talent al menige harte bly gemaak het oor jare. En dit is juis dit wat haar laat besluit het om ingeperkte ledige ure in omgee-ure te verander om ‘n positiewe verskil in mense se lewens te maak.
Jo-Ann en haar man, Fasie, is onderskeidelik sekretaresse en ondervoorsitter van die Solidariteit Helpende Hand Diamant-tak.
Jo-Ann vertel dat hulle tussen 5 en 10 maskers op ‘n slag aan die heining hang, en dan aanvul soos nodig. Sy maak die maskers uit katoen.
Die idee om die maskers te maak het begin nadat haar ma ‘n week tevore by die polisie ‘n masker gekry het toe sy dorp toe gegaan het.
Sy het die patroon afgetrek en vir Jo-Ann gegee.
“Hier in Bronkies kan ons nie maskers koop nie. Ek weet die tuisgemaaktes is dalk nie ideaal nie, maar dis beter as niks.”
Sy vertel dat sy Sondag begin het om 5 maskers te maak. Maandag was daar nog van die vyf oor en het sy 3 bygesit, maar teen Dinsdagoggend vroeg was tien maskers klaar gehaal en was sy fluks besig om nog te maak.
Ook in Parys het Epilepsie SA se Vrystaat/Noordwes-sentrum reeds begin met die kreatiewe idee om maskers te maak en te verkoop nadat hul armband-projek moes sluit wat vroeër aan toeriste op passasierskepe verkoop is. Broodnodige inkomste om dié sentrum finansieel te laat oorleef, wat daar nou met die staat van inperking skielik nie meer is nie.
Gaan kyk op hul webtuiste www.epilepsy.ngo en ondersteun ook hierdie projek.
Vir elke R100 wat die sentrum ontvang kan drie lapmaskers gemaak word.
