Is jy ook een wat vrek oor ‘n ‘bargain’. Of dit nou ‘n leer sitkamerstel, ‘n stel gholfstokke of ‘n paar valstande is – mense is ewig op soek na ‘n ou winskopie. Met Facebook en ander sosiale media platforms, is aanlyn kopies ‘n groot versoeking. Jy kan letterlik op jou selfoon blaai van die een ‘bargain’ na die ander en vinnig en maklik vanuit die gerief van jou huis ‘n paar winskopies kry. Als aanlyn.

Maar oppas! Naas diefstal van koper, roof waar grypdiewe waardevolle items by jou sou vat, en diefstal by OTM’s,  is aanlyn bedrog en skelmstreke van die grootste misdaad waarmee die polisie in Parys nou letterlik daagliks te doene kry.

Mense koop en verkoop laat dit bars aanlyn, maar baie selde word die webtuiste of persoon wat die item verkoop se profiel nagegaan. Vergeet maar daarvan om die telefoonnommer of adres agterna op te spoor – skelms is baie meer uitgeslape as dit.

Weet maar – as iets te goed is om waar te wees, dan is dit. Dalk het jy al sonder probleme ‘n hele paar goed aanlyn bestel of gekoop, maar onthou net daar is altyd ‘n eerste keer vir alles. Dalk is jy die volgende een wat met ‘n aanlyn kopie uitgevang word en van jou swaarverdiende geld verloor.

So skakel jy Parys SAPD

Parys SAPD se telefoonlyne is datalyne. Dit beteken dat waneer daar kragonderbrekings is, mag jy dalk sukkel om deur te kom na die polisie se gemeenskapdienssentrum.  Al klink dit of die telefoon aan jou kant lui, lui die telefoonlyn in der waarheid dan nie in die gemeenskapdienssentrum nie, en skep dit dan by die pubiiek die persepsie dat daar nie antwoord is nie.

Stoor daarom die volgende nommer vir Parys SAPD wat te alle tye sal werk

Parys SAPD – 082 466 7416