Die polisie in samewerking met privaatsekuriteit en verskeie gespesialiseerde eenhede het in totaal die afgelope week verskeie verdagtes in die Vrystaat in hegtenis geneem in verband met onwettige mynbou aktiwiteite, oortreding van die Immigrasie Wet en die besit van vermoedelik gesteelde eiendom as deel van die voorgesette multi-dissiplinêre Operasie Vala Ungodi. Die operasie het gefokus op onwettige mynboubrandpunte by ongebruikte mynskagte en onwettige verwerkingsterreine in Odendaalsrus, Welkom, Theunissen en Virginia..

Polisiewoordvoerder sersant Mahlomela Kareli het bevestig dat verskeie beslagleggings gemaak is tydens die arrestasies. Naas toerusting wat gebruik word vir onwettige myboubedrywighede, is Khat met ‘n straatwaarde van R45 000 gekry, en onwettige sigarette met ‘n waarde van R500 000. Die verdagtes wat met die onwettige sigarette gevang is, het selfs vergeefs probeer om polisiebeamptes  met R15 000 om te koop om hul vry te laat, maar het die omkoopplanne hul duur te staan gekom. Naas die klag van die besit van onwettige sigarette is hulle nou ook aangekla van omkopery .

Kareli sê die verdagtes sal  in die onderskeie landdroshowe in die Vrystaat verskyn.