‘n Grusame botsing op die N1-hoofweg tussen Rooiwal en Heuningspruit, het vanmiddag die lewens van twee persone ge-eis, ná ‘n trompop botsing tussen twee voertuie.

Met die impak van die botsing het die voertuie aan die brand geslaan, en het twee persone in die brand omgekom.

‘n Derde persoon is per ambulans na ‘n Kroonstadse hospitaal vervoer. Die botsing was net na 14:00 vanmiddag.

Die identiteit van die oorledenes sal eers bekendgemaak word sodra forensiese en patologiese ondersoeke afgehandel is.

Inligting oor die omstandighede rondom die botsing is nog nie bekend nie.

Die pad is na 19:00 weer oopgestel vir verkeer in beide rigtings.