Die Ngwathe Plaaslike Munisipaliteit vergesel van ‘n span Rooikruiswerkers het vanoggend die Saundersville- en Phiritona woonbuurte by Heilbron besoek om ‘n opname te maak van hoeveel huishoudings ondersteuning nodig het nadat vloedwater huise in dié woonbuurte Sondag oorstroom het.

Berigte is ook oor die naweek ontvang van huise in die Kwakwatsi-woonbuurt by Koppies wat oorstroom is.

Beide Koppies en Heilbron val onder die Ngwathe Plaaslike Munisipaliteit se jurisduksie.

Die munisipaliteit sal ook dringend aandag gee aan die pomp by die onttrekkingspunt in die Vaalrivier vir die Vredefort watersuiweringswerke wat telkens wanneer die rivier se water styg, onder water is en in die verlede gelei het tot watertekorte vir die dorp.

Die situasie by die Koppies-watersuiweringsaanleg word ook gemonitor. Die suiweringsaanleg is aan die oewer van die Renosterrivier, en het in Mei vanjaar oorstroom toe Koppies Dam oorgeloop het in die Renosterrivier wat toe reeds in vloed sy walle oorstroom het.

Met die oorstroming van die aanleg vroeër vanjaar moes proseskontroleerders inderhaas die aanleg ontruim, en was die dorp vir vier dae sonder water voordat munisipale werkers uiteindelik te voet die aanleg kon bereik om die omvang van die skade te bepaal.

Koppiesdam was gister 124% vol.

Samesprekings is na die vorige vloed met die Departement van Waterwese en Sanitasie gevoer oor die moontlikheid om die Koppies- suiweringsaanleg weg van die rivieroewer te skuif.