Tweede brand by Vrystaatse hospitaal in net meer as ‘n week
Pasiënte wat in die hospitaal was ten tyde van die brand is reeds na ander hospitale oorgeplaas
Die brand wat vroeër by die Phuthuloha hospitaal in Ficksburg ontstaan het, is geblus en is die 11 pasiënte wat in die hospitaal was betyds na veiligheid geneem en oorgeplaas na hospitale in Clocolan, Ladybrand en die Dihlabeng Streekshospitaal.
Hospitaalpersoneel het toe die brand uitgebreek het begin om met brandblussers die vuur te blus en het nooddienspersoneel en lede van die munisipale brandweerdiens verdere bystand verleen.
Mondli Mvambi, woordvoerder van die Vrystaatse departement van gesondheid sê die oorsaak van die brand sal ondersoek word. Daar is ook bevestig dat daar geen beserings weens die brand was nie.
Die brand by die Phuthuloha hospitaal volg net meer as ‘n week na die brand by Nasionale Hospitaal in Bloemfontein wat buite die pediatriese saal ontstaan het en toe na die eerste en tweede vloere van die hospitaal versprei het.
Die Manguang Metro Brand en Noodreddingsdienste en ander staat en private Nood Mediese Dienste het gehelp om die 83 pasiënte in sale na veiligheid te neem, en was daar ook geen beserings of sterftes weens die brand nie.
