Parys het goeie reën Maandagnag en Dinsdagoggend gehad met 14mm wat Maandagaand en 8mm reën wat vanoggend gemeet is, maar het die stormweer en wind ook weer talle kragprobleme in die dorp veroorsaak. Kragpale en bome is omgewaai, takke afgeskeur en selfs ‘n JoJo-watertenk van sy staander afgeruk deur die wind en  400m verder gekry waar dit teen ‘n muur vasgewaai het.

Van die bome wat omgeval het was in onder meer Chinnstraat, op die R59 tussen Parys en Vredefort en by die Potchefstroom-brug. Vrywilligers het reeds Maandagnag gehelp om bome uit die pad te verwyder.

In die Vredefort-distrik is tussen 2 en 20mm reën op plase gemeet.

Vaaldam staan nou op 24,90% met 21,2mm reën wat in die Vaaldam se opvangsgebied geval het.

Bloemhofdam is nou 68,46% vol.