Altesaam 1 502 mense het in 1 234 noodlottige ongelukke op die land se paaie oor die Desember-vakansie gesterf. Van die sterftes was 41% voetgangers. Die minister van vervoer, Barbara Creecy, het in haar boodskap vandeesweek haar medelye met die familie van die oorledenes betuig, en ook diegene wat in padongelukke beseer is, ‘n spoedige beterskap toegewens.

Creecy het gesê haar departement sal hom toespits om die gedrag van padgebruikers te verander, en om te belê in die ontwerp en bou van veilige paaie, om spoedbeperkings af te dwing veral op paaie wat hoë verkeersvloei dra, en om toegang tot nood reaksiesentrums en kwaliteit traumasorg te verseker.

Sy het met die bekendmaking van die syfers gesê die 2024 syfer het met 5.3% gestyg teenoor die 2023-syfer. Creecy het ook bekendgemaak dat 3 840 mense oor die feestyd vir dronkbestuur in hegtenis geneem is, terwyl 414 arrestasies vir spoedoortredings gemaak is. Een spoedoortreder wat gearresteer is, het teen ‘n spoed van 245km/h op die N1-hoofweg gery.