Waar vroue bid, beweeg God se hand. Dit was die boodskap van Johan Swanepoel waar hy Vrydag vroue van Parys by die NG gemeente Parys-Oos met Woord en sang bedien het op Wêreldbiddag vir vroue. Hierdie jaar se gebedstema is deur die vroue van die Cook-eilande gekies.

Vanjaar was die 95ste keer dat Suid-Afrika aan hierdie wêreldwye ekumeniese gebedsdag deelgeneem het wat in 176 lande en streke jaarliks gehou word. Die gebedsdag val tradisioneel op die eerste Vrydag in Maart.

Swanepoel het gesê vroue moenie onderskat wat hulle vir God kan doen nie. “Wees ‘n rigtingwyser. Jy het dalk min, maar God maak jou min baie.”

Hy het ook ‘n beroep gedoen op vroue om positief oor hulself te dink en te weet dat elke vrou wonderbaar gemaak is. Swanepoel het gesê dat daar geen teenvoeter vir gebed is nie, en dat vroue daarom biddend moet bly.

Die aand is afgesluit met ‘n ete van tradisionele kos eie aan die Cook-eilande.