Die Golden Traingle Chamber of Commerce se Rocking the Vaal 2025 het die afgelope naweek gesorg vir nie minder nie as drie wêreldrekords.

Na dese pronk die Vaaldriehoek in die Guinness World Records vir die die grootste pot mieliepap wat gemaak is, die langste kebab en die meeste mense wat op een slag ‘n brood kon breek.

Seshonderd en sewe leerders deelgeneem aan die brood breek-rekord toe daar om die langtafels plekke ingeneem is vir dié uitdaging. Die vorige rekord is in die VSA in 2019 opgestel met 478 mense wat aan dié poging deelgeneem het.

Vir die grootste pot mieliepap is ‘n allemintige 2 ton mieliemeel gebruik – dubbeld dit wat met die vorige rekord gebruik is. Die einddoel was om 12 000 mense met die groot gemeenskapsprojek en feestelikheid te kon kos gee.

Vir die kebab-rekord het Rocking the Vaal geskitter met ‘n 3km lange kebab gemaak van 2,4 ton vleis. Die vorige rekord wat opgeteken is, was vir ‘n kebab van 2,047km. Altesaam 2 048 mense het gelyktydig aan die vleis gebraai.

Verlede jaar het die Goue Driehoek-sakekamer met Rocking the Vaal eweneens die rekordboeke herskryf met ‘n serp van meer as 35km lank, en die grootste porsie potjiekos.

Die naweek was ‘n fees van musiek met verskeie kunstenaars, kos, kuier en ‘n spanpoging soos min wat by die Emerald Resort & Casino geniet is.