Sassa-begunstigdes wat hul toelae met die goue kaart van Sassa en Postbank kry, moet teen 31 Mei oorgeskakel wees na die nuwe swart Postbankkaarte. Die sperdatum was by herhaling in die verlede al  uitgestel.

Postbank is net een van die Suid-Afrikaanse banke wat die maandelikse uitbetalings maak aan 2,6 miljoen (of te wel 15%) van die 19 miljoen begunstigdes van maatskaplike toelaes. Die verwagting is nou dat sou Postbank-begunstigdes van maatskaplike toelaes met goue kaarte nie teen die sperdatum oorgeskakel het na die nuwe swart kaart nie, die kliënte moontlik na ander banke oorgeskuif sal word vir die uitbetalings.

So is vroeër gesê deur Sisisi Tolashe, die minister van maatskaplike ontwikkeling.

Die verbintenis is egter gegee dat geen begunstigdes se uitbetalings in gedrang sal kom nie, selfs na die sperdatum, en dat die geld in begunstigdes se rekeninge sal reflekteer.

Begunstigdes se rekeningnommers bly met die oorskakeling onveranderd.