Harde werk, dissipline en die wil om vir mekaar te speel het die basis gevorm en gelei tot ‘n oorwinning vir twee van Primêre skool Parys se rugbyspanne in die Valke-liga finaal.
Die skool se o9 A-span het op 11 Junie Fonteine Primêr finaal die knie laat buig met ‘n telling van 19-17 op Hoërskool Dr Malan se veld in Meyerton. Die span word afgerig deur mnre. J. Olivier en L. van Wyk.

Die o11B’s het ‘n drieë-fees gehad. In hul segetog tot by die finaal druk hulle 22 drieë en staan slegs ses af.

Goeie oorwinnings is oor Fonteine Primêr behaal met wentellings van 40-0 (liga) en 38-0 (semi-finaal).

Uiteindelik het ‘n telling van 20-12 ‘n oorwinning oor Emfuleni Park vir Parys beklink.

Speler van die jaar, Luan Swart het al 20 punte vir sy span op die telbord gesit in die finaal. Hy is ook by die jaareindfunksie aangewys as beste voorspeler van die jaar, terwyl Jaden Bam aangewys is as beste agterspeler van die jaar.

Dank aan die afrigters mnre. Altus Heunis, David de Jager en Leon Kruger, wat saam met die seuns naweke en vakansies opge-offer het om van die span ‘n wenspan te kon maak.
Daar is ook waardering vir elke ouer wat getrou die oefeninge en wedstryde bygewoon het, en ‘n stewige ondersteuningsbasis gevorm het.