“Ons het ’n toegewyde polisiebeampte verloor wat die hoogste prys betaal het in die uitvoering van sy pligte terwyl hy die gemeenskap gedien en beskerm het. Konstabel Mota se dapperheid en toewyding sal nie vergeet word nie.” So het majoor-geneeral (dr) Ryno Naidoo gesê na die tragiese dood van die 25-jarige konstabel Gift Mota op 4 Februarie nadat hy in ‘n dam verdrink het terwyl hy ‘n verdagte agterna gesit het in die Phokeng-gebied in Noordwes.

Konstabel Mota was verbonde aan die Sigbare Polisiëring Misdaadvoorkomingseenheid in Phokeng, en was besig met patrolliediens saam met van sy kollegas, toe hulle deur ’n gemeenskapslid genader is wat beweer het dat ’n verdagte, wat met sake van roof en huisbraak verbind word, opgemerk is.

Kolonel Adéle Myburgh sê die betrokke polisielede het die gemeenskapslid vergesel na die Masosobane- en Raffredy-afdelings – ’n bosagtige gebied met ’n dam naby. Nadat die verdagte opgemerk is, het die lede hom agternagesit. Die verdagte het in die dam ingehardloop, en is konstabel Mota agterna. Hy het kort daarna uit sig verdwyn terwyl hy agter die verdagte aangeswem het.

Die duikeenheid is ontbied wat die liggaam van die konstabel uit die dam gehaal het.

’n Geregtelike doodsondersoek sal gedoen word om die omstandighede rondom die voorval te ondersoek, het Myburgh bevestig.

Konstabel Mota is in November 2025 na Phokeng oorgeplaas en was oorspronklik van Ermelo in Mpumalanga.

Meegevoel

Naidoo, het sy innige meegevoel betuig teenoor die familie, vriende en kollegas van die konstabel Mota

Die polisie staan by sy familie in hierdie pynlike tyd en sal verseker dat hulle die nodige ondersteuning kry,” het  Naidoo gesê.

Naidoo het ook ‘n beroep op gemeenskappe gedoen om voort te gaan om nou saam met die polisie te werk in die stryd teen misdaad, terwyl hy ook erkenning gegee het aan die gevare wat polisielede daagliks in die uitvoering van hul pligte in die gesig staar.