Carina van den Berg is die Februarie-wenner van die Bybelblokraai-kompetisie wat maandeliks deur AGS Sion-gemeente in samewerking met Parys Gazette aangebied word. Vir Carina was die vreugde groot, want nie net is Februarie haar verjaardagmaand nie, maar is dit die eerste keer in haar 71 jaar dat Carina ‘n kompetisie wen.

Sy vertel dat sy mal is oor blokraaisels en elkeen invul waarop sy haar hande kan lê. Die vraag – wie die mees misterieuse figuur in die Bybel is, het haar goed laat kopkrap in die blokraai.

Haar aanvanklike gedagte was dat dit Metusalem moet wees, maar uiteindelik het sy dié antwoord in haar blokraai reg gehad as Melgisedek.

Die boekprys wat sy ontvang het, was Die krag van gebed wanneer jy vrees deur Stormie Omartian. Kyk uit vir die volgende Bybelblokraai in die AGS Sion se advertensie in die Gazette-uitgawe van 19 Maart.

Om in te skryf is so maklik as om die blokraai te voltooi, ‘n foto daarvan te neem en te WhatsApp na die nommer wat in die advertensie gegee word.