Die waarnemende provinsiale hoof van die Direktoraat vir Prioriteitsmisdaadondersoek in die Vrystaat, brigadier Ketlamoreng Mafoyane, het die ondersoekbeampte geloof vir uitstaande werk na die vonnis van drie beskuldigdes vir bedrg en verwante misdrywe waardeur VKB Agriculture (Edms) Bpk meer as R4m skade gelei het.

Khotso Mabolloane (51) is Vrydag in die Bloemfonteinse landdroshof tot effektief 15 jaar gevangenisstraf gevonnis vir bedrog en oortreding van die Wet op die Voorkoming van Georganiseerde Misdaad. Sibongile Nyembe (31) is gevonnig tot 12 jaar direkte gevangenisstraf vir bedrog en oortreding van die Wet op die Voorkoming van Georganiseerde Misdaad, terwyl Jabulane Joseph Mazibuko (40) gevonnis is tot sewe jaar direkte gevangenisstraf vir oortreding van die Wet op die Voorkoming van Georganiseerde Misdaad.

Verder is al drie beskuldigdes ingevolge Artikel 103(1) van die Wet op die Beheer van Vuurwapens, Wet 60 van 2000, onbevoeg verklaar om ’n vuurwapen te besit.

Luidens die hofstukke het die beskuldigdes 16 Februarie 2018 valslik voorgegee dat ’n betaling gemaak is vir dienste gelewer. Die betaling is egter in ’n ABSA-bankrekening gemaak wat later vasgestel is aan Mabolloane behoort het en nie aan Budget Truck Spares nie. Daar is bevind dat die betalingsdokument vervals is, en is die transaksie ongeldig verklaar.

Aanvanklik is ses verdagtes in hegtenis geneem, wat voor die landdroshowe in Bethlehem en Bloemfontein verskyn het.

Mabolloane, Nyembe en Mazibuko is op 16 April 2025 skuldig bevind, terwyl die aanklagte teen die ander beskuldigdes teruggetrek is.