Drie en twintig rugbyspanne en nege netbalspanne sal dié week in Parys aan die Parys Hoërskool Alumni Namgola-beker sportweek deelneem wat van 30 Maart tot 2 April op Parys Hoërskool se rugbyvelde en netbalbane aangebied word.

Dié week is oor jare ‘n trotse tradisie van die skool en bring 517 rugbyseuns, 85 netbaldogters, en hul afrigters en ondersteuners vir die week na Parys wat ‘n groot ekonomiese inspuiting vir die dorp is.

Die 35 rugbywedstryde en 27 netbalwedstryde wat tydens die week gespeel sal word, sal gestroom word op Supersport Schools.

Naas die aksie op die sportveld sal die deelnemers aan die sportweek ook hier kom witwaterroei, terwyl van die afrigters die dorp se spog gholfbane sal geniet, en ook ‘n draai by die unieke en uitsonderlike winkels in die dorp sal maak.

‘n Uitstekende bemarkingsgeleentheid vir die dorp en sy sakelui waarby nie net die skool nie, maar ook besighede en die gemeenskap jaarliks baat.

Kom ondersteun hierdie seuns en dogters tydens die week op die rugbyveld en netbalbaan, asook die heerlike kosstalletjies wat beskikbaar sal wees.

Skolesport op sy beste op jou voorstoep. Toegang kos R20 per persoon.

Die treffende foto is tydens die 2025 Parys Hoërskool Alumni Namgola Sportweek geneem met Hoërskool Parys se Nico Rust in aksie tydens ‘n sopnat wedstryd teen Zastron in die Plaat-finaal. Foto: Ferdie Jordaan.