Parysenaars het vir jare die vriendelike gesig van Carin Smith in die destydse Roodt Apteek geken waar sy as apteker diens gedoen het. Sy was ‘n mense-mens en geliefd by elkeen van haar kliënte.

Carin is Dinsdagaand 24 Maart oorlede, na ‘n stryd van byna drie jaar met lymphoma kanker. Sy het in Ekklesia Park gebly waar sy tot haar dood met liefde versorg is.

Carin was 57 jaar oud.

Naas Roodt Apteek het sy vroeër ook by Medi Stop in Vanderbijlpark as apteker diens gedoen.

Parys was die enigste plek waar sy wou bly en was sy vir meer as 25 jaar in die dorp gevestig.

Vir Carin kon jy altyd deur ‘n ring trek – goed versorg en met ‘n oog vir ‘n mooi uitrusting. Sy was iemand wat altyd ‘n plan gehad het om dinge te laat uitwerk. ‘n Sterk mens wat bly veg het om te leef tot die einde toe.

Haar lag was aansteeklik. Haar katjie Pebbles haar gunsteling, en haar groot bederf om te lees, ‘n soetdingetjie en ‘n koppie koffie.

Carin se gedenkdiens is Donderdag, 2 April, om 11:00 vanuit die Ecclesia Family Church in Parys.

Sy sal met net die mooiste herinneringe onthou word deur haar ma, Leen, broers, Lodewyk en Francois Robbertze, haar suster, Christa Dunn, en dogters, Carla en Carmen Pretorius