Motoriste word gewaarsku dat die R59 tussen Parys en Vredefort steeds gesluit is vir alle verkeer vir herstelwerk aan slaggate deur ‘n kontrakteur. Die hoop is om teen Donderdag dié gedeelte van die R59 weer te kan oopstel vir die Paasnaweek-verkeer met herstelwerk wat dan grotendeels as weerstoestande dit toelaat, voltooi behoort te wees. Herstelwerk sal na die Paasnaweek voortgesit word.

Verwag verkeersvertragings met verkeer wat net buite Parys in die rigting van Vredefort van die R59 via die Schoemansdrift-pad herlei word. Verkeer is tans baie druk hier en moet jy ekstra reistyd inreken sou jy die roete ry.

Daar is duidelike borde wat aandui dat die pad hier gesluit is. Verkeerspersoneel doen ook diens hier om te help met verkeersvloei wat druk is.

Groot skade is die afgelope naweek op die Schoemansdrift-pad veroorsaak met die teer wat gesak het weens swaar reën en swaar voertuie wat die pad moes gebruik as gevolg van die sluiting van die R59 tussen Parys en Vredefort.

Verskeie voorvalle waar voertuie hier vasgesit het is gerapporteer, asook van ‘n vragmotor wat vroeg vanoggend die pad byster geraak en toe vasgesit het, maar is die Paaie Departement reeds besig om die pad te skraap en reg te maak op die alternatiewe roete waar die teer gesak het.

Verminder spoed, wees geduldig en wees waaksaam.

‘n Ernstige beroep word ook weer op motoriste gedoen om nie te skuif aan padborde of padmerkers wat aandui dat ‘n pad gesluit is nie. Die onnadenkende optrede veroorsaak ‘n groot gevaar vir jou, vir mede-motoriste wat jou voorbeeld volg om dan die pad te gebruik, asook konstruksiewerkers op die pad. Dit het herhaaldelik die naweek gebeur dat motoriste op die R59 aan merkers geskuif het.

Die slaggate op die R59 is ‘n groot probleem en is dit nodig dat die herstelwerk gedoen moet word ter wille van motoriste se veiligheid. Daarom is dit belangrik dat motoriste sal saamwerk. Daar word werklik ‘n groot poging ingesit om die gedeelte van die R59 wat bykans onrybaar was te herstel.