‘n Brand vroeër vanmiddag by die klimraam in die park in Eerstelaan is vinnig deur die Ngwathe Brandweer- en Nooddiens geblus nadat hulp op ‘n noodgroep gevra is.
Die brandweer was vinnig op die toneel, en is niemand in die brand beseer nie.
Presies drie jaar gelede is daar hande gevat om dié parkie reg te maak danksy ‘n inisiatief van MooiParys, met die hulp van gewillige hande en oop harte. Vir weke is daar hard gewerk om die vullis wat voorheen gesaai was in die parkie weg te ry. Die lang gras is gesny en Pula Build it het gehelp om die klimraam te herstel en te verf.
Vanmiddag het bolle swart rook in die lug gehang waar die bande om die klimraam gebrand het.
Tydens die wintermaande wanneer dit nie reënseisoen in groot dele van die land is nie, is die gevaar vir grasbrande altyd hoër. Juis daarom moet jy onder geen omstandighede oop vure maak nie. Wees veral bedag op winderige weerstoestande wat ‘n brand vinnig buite beheer kan laat woed. Selfs ‘n sigaretstompie wat neergegooi word in ‘n veld, of vonke as gevolg van die gebruik van sekere gereedskap kan in ‘n oogwink ‘n brand veroorsaak.
Ngwathe Brandweerdiens kontaknommers:
082 909 3464
067 424 2372
