Twee onwettige immigrante is Maandag, 27 Julie in Klerksdorp in hegtenis geneem nadat die polisie onwettige sigarette met ‘n beraamde straatwaarde van meer as R2 miljoen in hul besit gevind het.
Die inhegtenisname het gevolg op ‘n intelligensiegedrewe operasie deur lede van die Openbare Orde Polisiëringseenheid (POP) en die Potchefstroomse Blitspatrollie.
Sersant Kelebogile Morake sê die sigarette is gekry nadat die polisie ‘n vragmotor op die N12 naby Matlosana voorgekeer het waarin bokse vol onwettige sigarette versteek was.
Die bestuurder en sy bemanningslid, onderskeidelik 39 en 41 jaar oud, is op die toneel in hegtenis geneem. Die polisie het ook beslag gelê op die onwettige sigarette sowel as die vragmotor.
Die twee verdagtes sal na verwagting Woensdag, 29 Julie, in die Klerksdorp-landdroshof verskyn op aanklagte wat verband hou met die besit van onwettige sigarette.
Die waarnemende polisiekommissaris in die Noordwes-provinsie, generaal-majoor (dr.) Ryno Naidoo, het die betrokke polisielede geloof vir hul toewyding en professionele optrede.
Hy het gesê die suksesvolle beslaglegging bevestig die SAPD se volgehoue verbintenis om onwettige handel te bekamp, wat die land se ekonomie benadeel en georganiseerde misdaad aanwakker.
Naidoo het bygevoeg dat die polisie sal voortgaan om operasies te verskerp wat daarop gemik is om kriminele netwerke wat by die onwettige handel in goedere betrokke is, te ontwrig.
“Diegene wat kies om aan hierdie onwettige aktiwiteite deel te neem, moet weet dat die lang arm van die gereg hulle uiteindelik sal inhaal,” het hy gesê.
