’n Man wat vermoedelik deel is van ’n sindikaat wat betrokke is by miljoene se bedrog met die lisensiëring van motorvoertuie, sal na verwagting môre, Donderdag 30 Julie voor die Parys-landdroshof verskyn, nadat hy Dinsdagaand ná ‘n uitgebreide ondersoek van drie jaar, in Parys in hegtenis geneem is.

Die man het glo motorvoertuigeienaars gehelp om voertuiglisensies onwettig te hernu deur die Nasionale Verkeersinligtingstelsel (NaTIS) vanaf sy privaat woning te gebruik.

Die arrestasie is gemaak tydens ’n gesamentlike intelligensiegedrewe operasie deur die Padverkeersbestuurskorporasie (RTMC) se Nasionale Anti-Korrupsie-eenheid, lede van SAPD Misdaadintelligensie Taktiese- en Spesiale Operasies, asook die Valke en hul kubermisdaadeenhede/

Met die arrestasie is ‘n rekenaarskerm gekry met die Natis aantekenskerm daarop, en die gebruiksnaam en wagwoord reeds ingesleutel. NaTis dokumente en verslae van verskeie provinsies is ook onder meer gekry.

Volgens RTMC woordvoerder, Simon Zwane, is die man vermoedelik deel van ’n sindikaat wat in suidelike Gauteng en die Vrystaat bedrywig is. Die groep werk glo saam met regeringsamptenare in verskeie provinsies om voertuiglisensies onregmatig op die NaTIS-stelsel te hernu.

Die sindikaat teiken na bewering Bestuurderslisensietoetssentrums (DLTC’s) waar biometriese stelsels nog nie geïnstalleer is nie.

Die RTMC sê die groep beskik ook oor toegangsbesonderhede van privaat voertuigtoetsstasies, wat hulle in staat stel om voertuie op die stelsel as padwaardig te registreer en te verklaar.

Die RTMC en die polisie ondersoek die saak die afgelope drie jaar en meen dat nog arrestasies binnekort kan volg.

“Die verdagte, wat vermoedelik ’n IT-spesialis is, het voormalige vervoeramptenare, aktiewe NaTIS-gebruikers uit verskillende provinsies, asook die Nasionale Departement van Vervoer geïmpliseer. Hierdie inhegtenisname is ’n belangrike deurbraak in die ondersoek na die bedrywighede van dié sindikaat,” het die RTMC in sy verklaring gesê.