Die Parys Working on Fire span het verlede week gehelp om met ‘n beheerde brand werk te maak van indringerplante waaronder ook katbos en droë takke wat met die ontbossing in die Parys Vleiland-gebied uitgehaal is.

Die hulp van die Working on Fire span was van groot waarde, en vorm deel van die span se gemeenskapsbetrokkenheid waar hulle onder meer ook bewusmaking by skole doen oor brandvoorkoming.

Benewens die vasvat van indringerplantspesies en die gereelde skoonmaakaksies in die Parys Vleiland Park, is daar die afgelope twee weke ook hard gewerk om die Rail Trail met 600 m te verleng na die ou stasiegebou.

Die Rail Trail help honderde voetgangers om daagliks droogvoets deur die vleiland tussen woongebiede, en die dorp- en nywerheidsgebied te kan beweeg. Met die eerste fase van die Rail Trail wat vroeër al in gebruik gestel is, is 1,4 km spoorlyn wat deur die vleiland loop en vir jare in onbruik was, gelyk gemaak en opgevul om ‘n netjiese voetpad te vorm wat deur stappers, drawwers en fietsryers gebruik kan word.
Vandeesweek is voortgegaan met ontbossing in die rietbos agter die Sonskyn Tehuis in Eerstelaan, en is ook daar werk gemaak van indringerplante.

Met voltooiing van die verlengde Rail Trail sal dit beteken dat voetgangers dan by die brug in Father Balinkstraat sal kan opklim, of verder af by Dolfstraat pleks van deur die stegie by die laerskool sportgronde te loop.

Die ontwikkeling, met finansiële steun van Sasol, Damlaagte Solar en Ilikwa Solar, help nie net om die vleiland te rehabiliteer sodat dit benut kan word nie, maar skep ook ‘n veiliger ruimte in die oorgroeide dele wat vroeër ‘n wegkruipplek vir kriminele elemente was.