3 September 1930 – 6 Augustus 2020
Mnr. Gerald Bezuidenhout (89) is Donderdag, 6 Augustus na ‘n kort siekbed in Huis Eikelaan versorging oorlede. Hy was ‘n ouditeur by die firma Bezuidenhout & Steyn.
Gerald en sy oorlede vrou Lettie was sedert 1961 inwoners van Potchefstroom. Hulle het hul vyf kinders, André, Lynette, Karien, Deon en René hier grootgemaak. Hy was eers ‘n vennoot saam met Newton Walker, O.T. Venter en Dick Daly en het sy eie ouditeurspraktyk in 1964 begin. Later het Petro Steyn & Hans Jonker as vennote by hulle aangesluit. Hy het ‘n paar jaar gelede uit die aktiewe praktyk getree. Hy was betrokke by die Potchefstroomse Afrikaanse Sakekamer en ook by die Suiderkruisfonds wat insamelings gedoen het vir weermaglede wat by grensoperasies betrokke was. Gerald was ook betrokke by sy kerk waar hy vir meer as veertig jaar met die finansies gemoeid was. Hy was ook met die direksie van Huis Eikelaan Trust gemoeid. Hy het diep spore in die Potchefstroomse sakegemeenskap getrap. Hy het ook vir rekenmeesterstudente by die destydse PU vir CHO (nou NWU) klasgegee.
“Ons dank die Here vir sy lewe, talente en omgee vir ander. Hy het Lettie vir 18 jaar na ‘n beroerte-aanval versorg en het sy kinders en kleinkinders saam met haar geniet. Hulle was vir byna 59 jaar getroud toe sy in 2013 oorlede is,” sê sy kinders. Hy word oorleef deur sy kinders Lynette en Günther, Ester, Deon en Sonja, Karien en René en 12 kleinkinders. Die familie bedank Huis Eikelaan se bestuur en die versorgingseenheid se personeel vir die sorgsaamheid waarmee hulle hom hanteer het.
* Familie en vriende wat Saterdag, 15 Augustus by ‘n virtuele nagedagtenis en viering van sy lewe wil inskakel, kan een van die familielede vir meer inligting kontak.