Potch Old Boys het Sondagmiddag op hulle Facebook-blad bevestig dat Deon Fourie Sondag, 14 Desember oorlede is.

“Ek wil graag die nuus van Deon Fouries se afsterwe om 10:45 deel. Ek is net so verpletter soos ek weet julle almal is – julle gedagtes, gebede en woorde van vertroosting aan die Fourie-familie word geweldig waardeer. Aan die familie, ons opregte meegevoel met die afsterwe van Deon so kort na Johnathan – julle hartseer is ons hartseer.”

Medelye het ooral oor sosiale media vir Deon se familie ingestroom.

Kolonel Adelé Myburg, polisiewoordvoerder, het bevestig Deon is vanoggend in die hospitaal oorlede.

“Die aanklag van poging tot moord het nou na moord verander. So dit is ‘n dubbel moord wat tans ondersoek word. Die verdagte is steeds gehospitaliseer.”

Deon is op 10 November ernstig beseer na ‘n skietery by Chubby Chick in Potchefstroom wat die lewe van sy broer, Johnathan Fourie op die toneel geëis het.