Vier verdagtes in Donovan Marx-plaasaanval verskyn in hof
Die verdagtes staan tereg op ses aanklagtes wat poging tot moord en roof met verswarende omstandighede onder andere, insluit.
Die verdagtes in die plaasaanval op die Ventersdorpse boer, Donovan Marx, het vanoggend (Dinsdag, 3 November) vir die eerste keer in die Ventersdorpse landdroshof verskyn.
Die vier verdagtes is Phimdile Nomngcayi (29), Godfrey Mathipa (56), Thomas Motlhonglong (27) en Jan Maishone (53).
Die vyfde verdagte sal na bewering as ’n artikel 204-getuie ingevolge die Suid-Afrikaanse Strafproseswet, 51 van 1977, optree. Die verdagte was vermoedelik medepligtig aan die voorval, maar sal na verwagting as ’n staatsgetuie geroep word.
Die staat het aangedui dat die verdagtes op ses aanklagte teregstaan, naamlik poging tot moord met verswarende omstandighede, roof met verswarende omstandighede, aandanding, die besit van ongelisensieerde vuurwapens, die onwettige besit van ammunisie en die rig van ‘n vuurwapen.
Daar word beweer dat die verdagtes betrokke was by die wrede aanval op Marx op sy plaas tussen Potchefstroom en Ventersdorp op Woensdag, 28 Oktober. Tydens die voorval is Marx se plaaswerker vasgebind, terwyl Marx aangerand is en sy ore afgesny is. Hy sterk tans in die Mediclinic Potchefstroom aan.
Die saak is tot Vrydag, 13 November, uitgestel vir die verdagtes se borgaansoek. Hulle bly in aanhouding en sal weer in die Ventersdorpse Landdroshof verskyn.
“Die staat en ondersoekspan is gereed om borg ten sterkste te opponeer,” het die Noordwes-polisiekommissaris, lt.genl. Arthur Peter Adams, buite die hof gesê. Hy het ook weer vir die ondersoekbeampte, kapt. Bonita Dry en haar puik span bedank.
Talle aktiviste en gemeenskapslede het hul ondersteuning aan Marx kom toon, met ’n groot media-aanwesigheid buite die hof.
Meer inligting oor vandag se gebeure sal deurlopend oor gerapporteer word.
