Twee matriekseuns het Woensdagmiddag twee babahondjies uit ’n kanaal gered.
Dawie Loots (18) van Volkies en Chris Verwey (18) van Ferdinand Postma, het die middag op die Mooibank-kleinhoewes rondgery toe hulle op die hondjies afgekom het.
Volgens Verwey het daar drie hondjies langs die kanaal gestaan, terwyl twee ander in die kanaal geval het.
“Die kanaal was nie baie diep nie, maar hulle was te klein om uit te kom,” vertel Verwey.
Volgens Loots was die hondjies baie moeg toe hulle hul uit die kanaal gehaal het. Hulle het dadelik al die hondjies na die DBV geneem.
Beide Loots en Verwey voel nie hulle optrede was heldhaftig nie. “Ons het net gevoel dis die regte ding om te doen”, het Verwey gesê.
Volgens die DBV is die hondjies redelik goed versorg. Daar word vermoed dat hulle Woensdag deur die dag deur iemand daar gelos is, omdat die ma nêrens te vind was nie.
Dié kruisras hondjies is nou veilig by die DBV, wat vir hulle goeie huise soek.