n Hond wat onlangs deur die polisie in Ikageng van ’n huis verwyder is, is moontlik in hondegevegte gebruik.
Volgens die DBV het die polisie die hond by ’n huis in Lekhelestraat gaan verwyder, nadat die bure gekla het die hond byt mense in die woonbuurt.
Die DBV het saam met die polisie na die perseel gegaan, waar die hond verwyder is.
“Hoewel die hond taamlik goed versorg is, was daar verskeie tekens van wonde aan die hond wat al gesond geword het,” het die DBV se veearts dr. Ninette Leistner, gesê.
Volgens haar is die hond se ore geknip en het hy baie krapmerke aan sy lyf wat ooreenstem met bakleiery.
Die DBV sê hulle werk saam met die polisie om hondegevegte in Potchefstroom stop te sit. Hulle sê dit is egter ’n lang en gevaarlike proses omdat dié praktyk dikwels gepaard gaan met mense waarby ook dwelm- en onwettige wapenhandel betrokke is.