Die polisie het vanoggend bevestig dat EFF-leier, Julius Malema, se motorbestuurder, nog nie vandag (15 November) voor die hof sal verskyn nie. Die polisie sal eers die saak volledig ondersoek.
Die bestuurder is gister na die polisiestasie in Parys gebring waar ‘n klagte vir die oortreding van die Padverkeerswet gelê is. Intussen is die bestuurder vrygelaat maar moet in die hof verskyn wanneer ‘n datum gereël is.
Verkeersbeamptes het gister naby Parys probeer om Malema se silwerkleurige Mercedes Benz van die pad af te trek toe die motor tussen die Vaalrivier en Vaalplaza-tolhek buite Parys teen 187km in ‘n 120km sone oor die spoedlokval is.
Die motor het egter weggejaag en is deur verkeersbeamptes agterna gesit wat die motor in Ventersburg van die pad afgetrek het. Die motorbestuurder is teruggebring na Parys waar die klag gelê is.
Malema was onderweg na Bloemfontein waar hy vir ‘n ander saak voor die hof moes verskyn.
Malema se motorbestuurder nog nie in hof nie
