Bykans 20 jaar nadat Parys se munisipale swembad van Olimpiese standaard gesluit is omdat dit nie  deur die munisipaliteit onderhou is nie, wil dit nou lyk asof daar uiteindelik weer ’n swembad vir die dorp is!

Te midde van hittegolf temperature van naby 40 grade wat die afgelope week gevoel is, het kinders vanoggend (Donderdag 1 Desember) te lekker baljaar in die gat by die kruising van Loop- en Waterstraat. Boonop is die “swembad” heel sigbaar vir besoekers aan die dorp soos hulle die dorp binnery.
Motoriste moet maar vir eers verlief neem met die chaos by die reeds verwarrende kruising, want die munisipaliteit sukkel nou drie weke om die pyplek hier reg te maak en die gat toe te gooi.
Met al die reën wat Parys die laaste paar weke gekry het, het die gat sommer gou vol water geraak. En hoekom dan nie maar die water geniet – seer oog en skande vir die dorp of te nie!