Sowat R21 000 se goedere, waarvan ’n televisie, projektor, twee kasregisters se geld en van die drank is gesteel, toe daar vroeg Saterdagoggend by ’n gewilde kuierplek in James Morokalaan ingebreek is.
Die bestuurder wat die aand aan diens was by Die Mystic Boer, het soos normaalweg die deure omstreeks 02:00 gesluit en huis toe gegaan.
Omstreeks 05:15 het hy ’n oproep van Mooirivier Beskerming ontvang dat die alarm in die gebou afgegaan het.
Met sy terugkeer na die gebou het die bestuurder ‘n gebreekte venster gesien waardeur die inbrekers die gebou binnegegaan het.
Die eienaar van Die Mystic Boer, Eloise Botha, sê dat hulle die inbrekers se gesigte duidelik op die sekuriteitskameras wat binne die gebou is, kan sien en dat sy hulle dadelik sal uitken as sy hulle weer sien.
“Ons vermoed dat daar drie mense binne die gebou was en dat daar moontlik ’n vierde een buite in ’n voertuig gewag het,” sê sy.