Die liggaam van ‘n 58-jarige man is Sondagoggend (5 Februarie) in ‘n waterkanaal langs die Venterskroonpad, sowat 10km vanaf Potchefstroom, gevind.
Volgens kapt. Chaka van die Potchefstroom-polisie is die man, wat geïdentifiseer is as Shadrack Sani Tseko se liggaam omstreeks 10:15 gevind waar hy met sy gesig na onder in die water gedryf het. Die persoon wat dit gevind het, het dadelik die polisie geskakel en kort na hulle aankoms op die toneel was ER24 ook daar. Die polisie en ER24 het die man se liggaam uit die water gehaal, waarna hy op die toneel dood verklaar is.
‘n Geregtelike doodsondersoek word deur die polisie gedoen. Hoewel ER24 vermoed dat Tseko moontlik verdrink het, sal ‘n nadoodse ondersoek eers die werklike oorsaak van sy dood kan bepaal.
Teen druktyd kon die Herald nog nie met Tseko se familie in kontak kom nie.