Twee voertuie en ‘n motorfiets was vanoggend (6 September) in ‘n botsing by die Modderdampad afdraai op die N12 betrokke.

Negentien mense, waarvan 17 laerskoolkinders wat oppad skool toe was, is tydens die ongeluk beseer. 

Volgens Russel Meiring, woordvoerder van ER24, is die motorfietsryer in ‘n kritieke toestand na Potchefstroom Hospitaal vervoer vir verdere behandeling. 

“Die ander 18 pasiënte het slegs ligte tot matige beserings opgedoen. Hulle is ook op die toneel behandel waarna van hulle hospitaal toe geneem is vir verdere behandeling,” het Meiring gesê. 

Die presiese oorsaak van die ongeluk is nog onbekend maar plaaslike owerhede was op die toneel om verdere ondersoek in te stel.