‘n Man (27) en vrou (31) is Saterdag (6 Oktober) op aanklag van moord in hegtenis geneem nadat die polisie die lyk van ‘n man met ‘n meswond gevind het. 

Volgens kol. Adele Myburgh, polisiewoordvoerder, is die man wat in hegtenis geneem is ‘n opsigter by ‘n kerk. Hy en sy vriendin het glo die aand in die karavaan waar hy woon, gekuier. 

Later het die vriendin glo iets uit ‘n taxi gaan haal toe sy gesien het dat die ruit van die taxi oop is. Met nadere ondersoek het sy en haar vriend besef dat daar iemand in die taxi is. 

‘n Onderonsie het tussen die twee en die man in die taxi ontstaan. Die vrou het glo hulp gaan soek waarna die man wat in die taxi was weggehardloop het. Tydens die onderonsie is die man wat in die taxi was glo met ‘n mes gesteek. 

Die polisie het sy lyk ‘n kort entjie weg van die toneel in die veld aangetref. 

’n Saak van moord word ondersoek.