Die jaarlikse nooddienste parade wat deur die plaaslike brandbeskermingsvereniging (BBV) aangebied word, is op die nippertjie gekanselleer.
Dié parade sou moreoggend (8 Junie) plaasgevind het. Volgens Kobus Roux, voorsitter van die BBV, sou die parade deel van die BBV se 30-jarige bestaansvieringe vorm. Daar was reeds vanoggend (7 Junie) ‘n suksesvolle kerkdiens as deel van die vieringe gehou.
Volgens Roux was die papierwerk, vir die aansoek by die polisie om die parade te hou, nie volledig nie.
“Dit het gegaan oor die kategorisering van die gebeurtenis. Ons het nie in die aansoek aangewys of die gebeurtenis hoë, medium of lae impak op die gemeenskap sal hê nie,” het Roux gesê.
Die Herald het navraag by die polisie gedoen oor die kanselasie, maar ten tyde van publikasie is nog geen terugvoer ontvang nie.
