‘n Verdagte is vanoggend omstreeks 05:30 in Pretorius-straat doodgeskiet.
Volgens Christiaan Haefele, bedryfsbestuurder van Mooirivier Beskerming, het die sekuriteitsmaatskappy na ‘n alarm by ‘n huis in die straat reageer.
“Die beamptes het een verdagte op die perseel gevind,” vertel Haefele.
Hy het glo die beampte met ‘n skroewedraaier aangeval. Tydens die onderonsie is die beampte beseer.
“Die ander beampte wat saam reageer het, het geen keuse gehad nie. Hy moes die verdagte skiet,” verduidelik Haefele.
Die verdagte is op die toneel dood verklaar.
“Die verlies van lewe is nooit ons bedoeling nie en alhoewel ons elke moontlike voorsorg tref om voorvalle te hanteer sonder lewensverlies, is die veiligheid van ons beamptes vir ons van kardinale belang,” het Haefele vertel.
Die beseerde beampte is deur ER24 hospitaal toe vervoer. Volgens Haefele het die beampte gelukkig slegs ligte beserings aan sy kop opgedoen.
