Die ouers van ‘n sewe-jarige dogtertjie is Maandagoggend op die R500 tussen Parys en Fochville dood.

Volgens Russel Meiring, ER24 woordvoerder, het die familie se voertuig met ‘n trok gebots.

“Paramedici het om 11:35 op die toneel gekom. Die voertuig het langs die pad gelê terwyl die trok ‘n entjie weg gestaan het,” het Meiring gesê,

‘n Paramedikus wat van diens af was, het reeds die dogtertjie begin behandel. Sy het ernstige beserings opgedoen waarna sy per helikopter hospitaal toe geneem is.

“Die lyke van haar ouers is in die voertuig gevind. Ongelukkig het hulle reeds aan hulle beserings beswyk,” het Meiring gesê.

Die bestuurder van die trok het geen beserings opgedoen nie. Plaaslike owerhede was op die toneel vir verdere ondersoek.