Gewapende rowers sak toe op bejaarde egpaar in Bailliepark

Gewapende rowers het ‘n bejaarde egpaar van Bailliepark Donderdagaand (25 Maart) omstreeks 22:00 in hulle huis oorval en beroof.

Volgens kapt. Aafje Botma, polisiewoordvoerder in die Noordwes, was die man (73) en sy vrou besig om televisie te kyk toe die rowers toegang tot die huis verkry het.

Volgens die polisie het die rowers die egpaar met vuurwapens gedreig en die man vasgebind. Hulle het die huis deursoek en daarin geslaag om die kluis oop te kry. Kapt. Botma sê dat die rowers toe ‘n vuurwapen, kontant, twee horlosies en alkohol uit die huis gesteel en op die vlug geslaan het.

Nadat die aanvallers weg is, kon een van die slagoffers daarin slaag om die alarm se paniekknoppie te druk.

‘n Saak van huisroof is geopen en niemand is sover gearresteer nie.